O vixésimo Festival de Baile Tradicional Xirandola de Bandeira xa tén data de celebración. Será o 1 de xullo, sábado, ás 19.30 horas na Praza da Feira se as condicións climatolóxicas o permiten.
Nesta edición, na que participarán todas as categorías de baile do grupo silledense, chegarán dúas formacións convidadas: unha de Portugal e outra de Alacante. Trátase do Rancho Folclórico de Viseu, do país veciño, e o Grupo de Coros e Danzas de Monovar; a quen lle devolverá visita Xirandola en datas próximas.
A formación anfitriona, Xirandola, dará a coñecer como todos os anos o traballo levado a cabo ao longo dos últimos meses e nesta ocasión estreará a Jota e Muiñeira de Avión. É o comezo dun verán de saídas e de exhibicións para o grupo que se desprazará a Gran Canaria entre o 28 de xullo e o 6 de agosto, e actuará en Bermeo o 12 de agosto, sábado. Os membros do grupo xa están a traballar na organización de un bo número de actos con motivo dos seus vinte anos de vida, que se cumprirán no vindeiro ano. E, novamente, acadou un premio en vestiario no Concurso de Cantigas e Agarimos.