No Centro Cultural Vista Alegre de Bandeira poderá verse esta exposición, na que se amosará a historia do grupo folclórico a través de carteis, fotografías e vestiario

A exposición temática do grupo folclórico Xirandola de Bandeira só estará aberta ao público dous días: os vindeiros días 17 e 18 de marzo no Centro Cultural Vista Alegre da localidade silledense, e verá a luz con motivo da celebración dos vinte anos de vida da formación. Unha mostra que non deixa de ser unha acto máis con motivo desta efeméride, que conlevará a organización de máis actividades ao longo do ano. Fotografías, carteis, traxes e premios configurarán esta ampla exposición que é unha retrospectiva do grupo. «É unha lembranza dos últimos vinte anos, pero tamén con visión de futuro» explica Javier Blanco, membro da agrupación.

Expor todo o material bibliográfico de Xirandola é tarefa imposible, pero tampouco resultou doado facer unha seleción de material. «Só fotografías pode achegarse á cifra a catro mil. A meirande parte das mesmas pertencen aos fondos do grupo, pero logo cada un conta con varias na súa casa. De feito fíxose unha seleción por temas, algunhas ampliáronse e outras amosaranse a tamaño normal».

Os visitantes atoparanse tamén con vellos carteis nos que se anuncia a actuación da agrupación folclórica de Bandeira; o máis vello é un do ano 92 dunha Festa da Empanada «aínda que podería xurdir unha sorpresa de última hora e poderíamos contar cun do ano 1988 que, segundo parece, posúe unha moza gardado na súa casa». A riqueza e a variedade do vestiario de Xirandola é de sobra coñecida. Moitos dos premios acadados ao longo destes vinte anos foi precisamente pola coidada indumentaria do grupo, polo que nesta exposición non poden faltar tales elementos. Serán en total unha decena de traxes moi escollidos. «Estará o traxe de Bandeira, o de máis relevancia de cotío, o de máis lonxe, o que posúe máis abalorios e tentaremos amosar o máis antigo do grupo que supera os 120 anos e do que se conserva incluso a roupa interior do mesmo». Unha boa parte dos trofeos que foi conseguindo o grupo tamén sairá das habituais vitrinas para seren mostrados aos visitantes, ao igual cos logotipos que se presentaron a concurso. Todo iso poderá verse de 10 a 14 horas, e de 16 a 19.30 horas.

Pero Xirandola tamén é futuro. É o festival infantil que se celebrará o 12 de maio, é a próxima presentación dun documental e dun libro anecdotario sobre a formación, unha vindeira actuación en Toledo fixada para o 26 de maio e será tamén esa gran gala de peche de aniversario alá para decembro.